February 05, 2008 - 10:55
Warsaxaafadeed: UDUB oo ku eedeeyay Kulmiye in ay ku dacwoodeen Jendayi Frazer

Awdalnews Network=

HARGAYSA, 05 Feb. 2008--Warsaxaafadeed uu maanta soo saaray Guddoomiyaha Xisbiga talada haya ee UDUB wuxu ku eedeeyay Xisbiga mucaaridka ah ee Kulmiye in ay weftigii Maryakan ee ay hoggaaminaysay Wasiir Ku Xigeenka Arrimaha Dibadda ee Arrimaha Afrika ay dacawado u gudbiyeen halkay xisbiyada kale ee UDUB iyo UCID kala hadleen qadiyada Somaliland. Warsaxafadeedka oo uu ku saxeexnaa Guddoomiyaha Xisbiga Cumar Jaamac Faarax wuxu yidhi: "Sida aynu la wada socono waxa booqosho ku timid dalka Somaliland 03/02/08, Wasiirka Africa u qaabilsan dawladda Maraykanka( Assistant Secretary of state for African Affairs) Dr Jandayi Frazer. Waxay ahayd fursad aad u qaali ah in Wasiir ka socda dawladda Maraykanku yimaado dalka Somaliland iyadoo ka jawabaysa martiqaadkii madaxweynaha Jamhuuriyada Somaliland u fidiyey dhowaan markay isku arkeen wadankaeeda,si ay aragto xaalada dhabta ah ee ka jirta dalka. Jandayi waxay la kulantay xubno ka socda golaha Wasiirada, Xisbiyada dalka madaxweynaha iyo madaxweyne ku xigeenka JSL.

"Waxan halkan kaga hadlayaa wada hadalkii ay Xisbiyadu la yeesheen iyo farriinta aanu u gudbinay wefdiga. Waxa qof kasta oo muwaadin ahi filayaa in xisbiyadu ay u tartamayaan sidii Somaliland u noqon lahayd qaran madax bannaan oo beesha caalamka ka mid noqda. Waxay ahayd in wefdiga loo muujiyo sida aynu uga midaysan nahay qadiyada Somaliland iyo aqoonsigeeda iyo in muxaafid iyo mucaaridba si u wada iibgeeyaan sidii dalkeenu aqoonsi u heli lahaa. Waxan aad uga xumahay inaan maanta xuso in Xisbiga Kulmiye kala hadlay wefdiga markiiba arrimihii gudaheena ahaa ee aanu hore ugu murmi jirey. Waxa xisbigu markiiba hadalkiisa ku bilaabay:-

• In aan dawladdu ku dhaqmin miisaaniyadii sanadkii hore oo khilaaf ka jirey
• In Xukuumaddu is hortaagto sharciyada ka soo baxa golaha wakiilada
• In lagu tunto xuquuqul insaanka
• In si sharci darro ah loo xidhxidho saxaafada
• In si sharci darro ah loo xidhay qoladii qaran
• In xukuumadu ka dhigtay suuqi ganacsiga mid cid gaar ah u xidhan( Monopoly).
• In doorashada ay ka qabaan dareen ah inaanay qabsoomi doonin.
• Madaxweynuhu markuu soo noqday waxba nooma sheegin ee fadlan noo sheeg waxii uu idin kala hadlay

Doodahaasi oo dhammi waxay sawir aan wanaagsanayn ka bixinayaan Somaliland oo macnaheedu tahay yaan lana aqoonsan wax badan ayaa naga xune.

Ma xusin waxa badan ee wanaagsan ee Somaliland u qabsoomay habayaraatee. Bal dadka reer Somaliland ayaan u dhaafayaa waxii ay ka codsan lahaayeen iyo sida ay u kala horreysiin lahaayeen baahiyahooda,iyadoo dawladdii adduunka ugu awooda weynayd oo u timi, waxa ay weydiisan lahaayeen iyagoo haysta waqti kooban oo ah toban daqiiqadood.

Waxan aad ugu mahad celinayaa Xisbiga Mucaaradka ah ee UCID oo isagu halkaa ka caddeeyey inaanay ahayn meel aanu maanta wax iska sheegno ee aanu u nimi halkan sidii aanu uga hadli lahayn qadiyada aqoonsiga iyo hurumarinta Somaliland.

Waxa Xisbiga UDUB kala hadlay;

• Xisbiga UDUB waxu u sheegay inaanu ilaalinayno sharciga iyo dastuurka dalka
• inaanu dulqaad u leenahay dhaliilaha mucaaradku mar walba ka sheegaan Xukuumada.
• In Somaliland wax weyn ku soo kordhisay xasiloonida gobolka
• In Somaliland dhisatay dawlad, hogaan iyo goloyaal dadkeedu soo doorteen
• Waxa shacbiga Somaliland ka filayaan booqashadaada oo ah aqoonsi iyo in wax nagala qabto dimoqraadiyada, horumarinta iyo nabad gelyada
• In aanu diyaar u nahay doorashooyin xor iyo xalaal ah oo waqtigooda qabsooma.

Waxa xusuus mudan in Xisbiga Kulmiye weydiiyey Jandayi Frazer inaan Madaxweynuhu waxba uga sheegin waxii uu kala hadlay Maraykanka markuu tegey Iyada oo Jandayi u jawaabaysa waxay tidhi: waxau madaxweynuhu nagala hadlay aqoonsiga iyo inaanu wax kala qabano horumarinta dalka, iyadoo aanu arrinta aqoonsiga ku ixtiraamayno wadamada midowga Africa oo aanu rabno inay go’aan ka qaataan, anakuna aanu ku shaqayn doono go’aankooda. Waxiise anaga nagu xidhan cidna u soo mari mayno ee toos baanu wax ula qabsanaynaa Somaliland, sida; horumarinta dimoqraadiyada,mashaariicda horumarinta iyo nabad gelyadaba.